ବାତ୍ୟା ‘ବିପର୍ଯ୍ୟୟ’ର ମୁକାବିଲା ପାଇଁ ଏନସିଏମସିର ସମୀକ୍ଷା ବୈଠକ

ବାତ୍ୟା ‘ବିପର୍ଯ୍ୟୟ’ର ମୁକାବିଲା ପାଇଁ ଏନସିଏମସିର ସମୀକ୍ଷା ବୈଠକ
ଆରବ ସାଗରରେ ସୃଷ୍ଟ ବାତ୍ୟା ‘ବିପର୍ଯ୍ୟୟ’ର ମୁକାବିଲା ପାଇଁ ଗୁଜରାଟ ସରକାର ଓ କେନ୍ଦ୍ର ମନ୍ତ୍ରାଳୟ ତଥା ସଂସ୍ଥାନଗୁଡିକର ପ୍ରସ୍ତୁତି ସମୀକ୍ଷା କରିବାକୁ ସୋମବାର କେନ୍ଦ୍ର କ୍ୟାବିନେଟ ସଚିବ ରାଜୀବ ଗୌବାଙ୍କ ଅଧ୍ୟକ୍ଷତାରେ ଜାତୀୟ ବିପଦ ପ୍ରବନ୍ଧନ କମିଟି (ଏନସିଏମସି)ର ବୈଠକ ଅନୁଷ୍ଠିତ ହୋଇଛି । ଭାରତୀୟ ପାଣିପାଗ ବିଭାଗର ମହାନିର୍ଦ୍ଦେଶକ ଡଃ ମୃତ୍ୟୁଞ୍ଜୟ ମହାପାତ୍ର ‘ବିପର୍ଯ୍ୟୟ’ର ସ୍ଥିତି ସମ୍ପର୍କରେ ସୂଚନା ଦେଇଥିଲେ । ବାତ୍ୟା ଦ୍ୱାରା ପ୍ରଭାବିତ ହେବାକୁ ଥିବା ଲୋକଙ୍କ ସୁରକ୍ଷା ପାଇଁ ସ୍ଥାନୀୟ ପ୍ରଶାସନର ପଦକ୍ଷେପ ସମ୍ପର୍କରେ ଗୁଜରାଟ ମୁଖ୍ୟ ଶାସନ ସଚିବ କମିଟିକୁ ଅବଗତ କରାଇଛନ୍ତି । ମତ୍ସ୍ୟଜୀବିଙ୍କୁ ସମୁଦ୍ରକୁ ନଯିବା ପାଇଁ ଓ ସମୁଦ୍ରରେ ଥିବା ମତ୍ସ୍ୟଜୀବିଙ୍କୁ ଫେରି ଆସିବାକୁ ପରାମର୍ଶ ଦିଆଯାଇଛି । ଅଧିକ କ୍ଷତିଗ୍ରସ୍ତ ହେବାକୁ ଥିବା ଗାଁଗୁଡିକର ତାଲିକା ପ୍ରସ୍ତୁତ କରାଯାଇ ସେମାନଙ୍କୁ ନିରାପଦ ସ୍ଥାନକୁ ଆଣିବାକୁ ଉଦ୍ୟମ ଆରମ୍ଭ ହୋଇଛି । ଏସଡିଆରଏଫର 10ଟି ଦଳ ମୁତୟନ କରାଯାଇଥିବା ବେଳେ ଏନଡିଆରଏଫର 12ଟି ଦଳ ମୁତୟନ ହୋଇଛନ୍ତି । ଆଉ ତିନିଟି ଦଳକୁ ପ୍ରସ୍ତୁତ ରଖାଯାଇଛି । ସେହିପରି ଆରାକୋଣମ, ମୁଣ୍ଡୁଳି ଓ ଭଟିଣ୍ଡାରେ ଥିବା 15ଟି ଏନଡିଆରଏଫ ଦଳକୁ ମଧ୍ୟ ଆଲର୍ଟ ରଖାଯାଇଛି । କାଣ୍ଡଲା ଓ ମୁନ୍ଦ୍ରା ବନ୍ଦର କର୍ତ୍ତୃପକ୍ଷଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି ।