ଟ୍ରିପଲ ମର୍ଡଲ ଘଟଣାରେ ବାପକୁ ଫାଶୀ, ପୁଅକୁ ଆଜୀବନ ଜେଲ ଦଣ୍ଡାଦେଶ

ଟ୍ରିପଲ ମର୍ଡଲ ଘଟଣାରେ ବାପକୁ ଫାଶୀ, ପୁଅକୁ ଆଜୀବନ ଜେଲ ଦଣ୍ଡାଦେଶ
ସମ୍ବଲପୁର ଜିଲ୍ଲା ବାମରା ବ୍ଲକ ଜରାବଗା ପଞ୍ଚାୟତର ଲପଡ଼ା ଗାଁରେ ପ୍ରାୟ ୩ ବର୍ଷ ପୂର୍ବରୁ ଗୋଟିଏ ପରିବାରର ୩ ଜଣଙ୍କୁ ହତ୍ୟା ଘଟଣାର ରାୟ ବୁଧବାର ପ୍ରକାଶ ପାଇଛି । କୁଚିଣ୍ଡା ଏଡିଜେ ରାଜକିଶୋର ଲେଙ୍କା ହତ୍ୟାକାଣ୍ଡର ମୁଖ୍ୟ ଅପରାଧୀ ନବୀନ ଦେହୁରୀକୁ ଫାଶୀ, ଅନ୍ୟତମ ଅଭିଯୁକ୍ତ ପୁଅ ହେମାନନ୍ଦ ଓରଫ ମଣ୍ଟୁକୁ ଆଜୀବନ ଦଣ୍ଡାଦେଶ ଦେଇଛନ୍ତି । ୨୦ ଜଣ ସାକ୍ଷୀଙ୍କ ବୟାନକୁ ଭିତ୍ତି କରି କୋର୍ଟ ଉଭୟ ବାପା ଓ ପୁଅଙ୍କୁ ଏକ ଲକ୍ଷ ଟଙ୍କା ଲେଖାଏଁ ଜରିମାନା ନିର୍ଦ୍ଦେଶ ଦେଇଛନ୍ତି । ସରକାରୀ ଓକିଲ ରବୀନ୍ଦ୍ର ନାୟକ ମାମଲାର ପରିଚାଳନା କରୁଥିଲେ । ସୂଚନାଯୋଗ୍ୟ, ଅକ୍ଟୋବର ୨୧, ୨୦୨୦ ଦିନ ପ୍ରାୟ ୨ଟା ବେଳେ ଲପଡ଼ା ଗାଁର ଗିରିଧାରୀ ପୂର୍ବରୁ କାଟି ରଖିଥିବା ଧାନ ‌ଆଣିବାକୁ ବିଲକୁ ଯାଇଥିଲେ । କିଛି ସମୟ ପରେ ନବୀନ ଦେହୁରୀ (୫୦) ଓ ତା ପୁଅ ମଣ୍ଟୁ ଦେହୁରୀ (୨୨) ଟାଙ୍ଗିଆ ଧରି ବିଲ ଅଭିମୁଖେ ଯିବା ଗାଁ ଲୋକେ ଦେଖିଥିଲେ । ସେଠାରେ ଗିରିଧାରୀଙ୍କୁ ନବୀନ ଓ ମଣ୍ଟୁ ଟାଙ୍ଗିଆରେ ହାଣି ହତ୍ୟା କରି ବିଲରେ ଫୋପାଡ଼ି ଗାଁକୁ ଫେରି ଆସିଥିଲେ । ସେତିକି ବେଳେ ଗିରିଧାରୀଙ୍କ ପତ୍ନୀ ସାବିତ୍ରୀ ସାହୁ (୩୫) ଓ ତାଙ୍କ ମା’ ପୀରବତୀ ବେହେରା (୫୫) ଗାଁ ଦାଣ୍ଡରେ ଥିବା ନଳକୂଅକୁ ପାଣି ନେବାକୁ ଆସିଥିଲେ । ଗିରିଧାରୀଙ୍କ ହତ୍ୟାକାରୀ ନବୀନ ଟାଙ୍ଗିଆରେ ଉଭୟ ମହିଳାଙ୍କୁ ନୃଶଂସ ଭାବେ ହାଣି ହତ୍ୟା କରିଥିଲା । ଘଟଣା ସମ୍ପର୍କରେ ଖବର ପାଇ ସମ୍ବଲପୁର ଏସ୍‌ପି କନ୍‌ୱର ବିଶାଳ ସିଂହ, କୁଚିଣ୍ଡା ଏସଡ଼ିପିଓ ରାଜକିଶୋର ମିଶ୍ର, ମହୁଲପାଲି ଥାନା ଅଧିକାରୀ ଜ୍ୟୋସ୍ନାରାଣୀ ବେହେରା, ସବଇନ୍ସପେକ୍ଟର ଦିଲୀପ ବେହେରା ସଦଳବଳେ ପହଞ୍ଚି ଘରେ ଲୁଚିଥିବା ଅଭିଯୁକ୍ତ ବାପ-ପୁଅ ନବୀନ ଓ ମଣ୍ଟୁକୁ କାବୁ ତଦନ୍ତ ଆରମ୍ଭ କରିଥିଲେ । ଘଟଣାଟି ଅତ୍ୟନ୍ତ ସମ୍ବେଦନଶୀଳ ହୋଇଥିବାରୁ ମାମଲାକୁ ରେଡ୍ ଫ୍ଳାଗ୍ ଟ୍ୟାଗ୍‌ କରାଯାଇଥିଲା ।