ଜୁନ୍‌ ୧୫ ପର୍ଯ୍ୟନ୍ତ କୁସ୍ତିଯୋଦ୍ଧା ଆନ୍ଦୋଳନ ସ୍ଥଗିତ

ଜୁନ୍‌ ୧୫ ପର୍ଯ୍ୟନ୍ତ କୁସ୍ତିଯୋଦ୍ଧା ଆନ୍ଦୋଳନ ସ୍ଥଗିତ
ଡବ୍ଲ୍ୟୁଏଫଆଇ ସଭାପତି ବ୍ରିଜଭୂଷଣ ଶରଣ ସିଂହଙ୍କ ବିରୋଧରେ ହୋଇଥିବା ଯୌନ ନିର୍ଯାତନା ଅଭିଯୋଗର ତଦନ୍ତ ଜୁନ୍‌ ୧୫ ସୁଦ୍ଧା ଶେଷ ହେବ । ସେ ପର୍ଯ୍ୟନ୍ତ ଅପେକ୍ଷା କରିବା ପାଇଁ କେନ୍ଦ୍ର ସରକାରଙ୍କ ଅନୁରୋଧ ପରେ ଆନ୍ଦୋଳନରତ କୁସ୍ତିଯୋଦ୍ଧାମାନେ ଏକ ସପ୍ତାହ ପାଇଁ ଆନ୍ଦୋଳନ ସ୍ଥଗିତ ରଖିବାକୁ ରାଜି ହୋଇଛନ୍ତି । କେନ୍ଦ୍ର କ୍ରୀଡ଼ାମନ୍ତ୍ରୀ ଅନୁରାଗ ଠାକୁରଙ୍କ ସହ ଦୀର୍ଘ ଆଲୋଚନା ପରେ କୁସ୍ତିଯୋଦ୍ଧାମାନେ କହିଛନ୍ତି ଯେ ଆନ୍ଦୋଳନରତ କ୍ରୀଡାବିତଙ୍କ ବିରୋଧରେ ରୁଜୁ ଏଫଆଇଆରକୁ ପୁଲିସ ପ୍ରତ୍ୟାହାର କରିନେବ ବୋଲି ସରକାର ପ୍ରତିଶ୍ରୁତି ଦେଇଛନ୍ତି । କ୍ରୀଡ଼ାମନ୍ତ୍ରୀ ଅନୁରାଗ ଠାକୁରଙ୍କ ସହ ହୋଇଥିବା ବୈଠକରେ ଅଲିମ୍ପିକ୍‌ ପଦକ ବିଜେତା ବଜରଙ୍ଗ ପୁନିଆ, ସାକ୍ଷୀ ମଲ୍ଲିକ, ତାଙ୍କ ସ୍ୱାମୀ ସତ୍ୟବ୍ରତ କାଦିଆନ୍‌ ଏବଂ ଜିତେନ୍ଦ୍ର କିନ୍‌ହା ଉପସ୍ଥିତ ଥିଲେ ।