ଓଡ଼ିଶା କ୍ୟାଡର ଆଇଏଏସ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ କେନ୍ଦ୍ରରୁ ଚିଠି

ଓଡ଼ିଶା କ୍ୟାଡର ଆଇଏଏସ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ କେନ୍ଦ୍ରରୁ ଚିଠି
ଦୀର୍ଘ ବର୍ଷ ପରେ ଓଡିଶାରେ ସଂଘୀୟ ବ୍ୟବସ୍ଥାର ଗୁରୁତ୍ୱ ହ୍ରାସ କରିବାକୁ ଉଦ୍ୟମ ଆରମ୍ଭ ହୋଇଛି । ଏକ ନିର୍ଦ୍ଦିଷ୍ଟ ରାଜନୈତିକ ଦଳର ଜଣେ ସାଂସଦ ଓ ରାଜ୍ୟ ସଭାପତିଙ୍କ ଅଭିଯୋଗ କ୍ରମେ କେନ୍ଦ୍ର ସରକାର ଜଣେ ବରିଷ୍ଠ ଆଇଏଏସ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚିଠି ଲେଖିଛନ୍ତି । ରାଜ୍ୟରେ ଶାସନ କ୍ଷମତାରେ ଥିବା ବିଜୁ ଜନତା ଦଳକୁ ବିରୋଧ କରିବାକୁ ଯାଇ କେନ୍ଦ୍ରରେ ଶାସନ କ୍ଷମତାରେ ଥିବା ଦଳର ସାଂସଦ ଓ ରାଜ୍ୟ ସଭାପତି ଭାରତୀୟ ସମ୍ବିଧାନକୁ ଅମାନ୍ୟ କରିବାକୁ ପଛେଇ ନାହାନ୍ତି । ସରକାର ବଦଳିବା ଏକ ନିୟମିତ ଏବଂ ନିରନ୍ତର ଧାରା । ହେଲେ ଭାରତର ବାବୁ ତନ୍ତ୍ର (ବ୍ୟୁରୋକ୍ରାସି) ହିଁ ଷ୍ଟିଲ ଫ୍ରେମ ଭଳି ଦେଶର ବିକାଶକୁ ଆଗେଇ ନେଇଥାଏ । ହେଲେ କିଛି ସୁବିଧାବାଦୀ, ଇର୍ଷାପରାୟଣ ନେତାଙ୍କ ପ୍ରରୋଚନା ଏବଂ ମନ୍ତ୍ରଣାରେ କେନ୍ଦ୍ରରେ ଶାସନ କ୍ଷମତାରେ ଥିବା ଦଳର ସାଂସଦ ଓ ରାଜ୍ୟ ସଭାପତି ଏହି ଷ୍ଟିଲ ଫ୍ରେମକୁ ଭାଙ୍ଗିବାକୁ ଉଦ୍ୟମ କରିଛନ୍ତି । ଆଉ ସେମାନଙ୍କ ଅଭିଯୋଗ କ୍ରମେ ଓଡିଶା କ୍ୟାଡରର ଜଣେ ଆଇଏଏସ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ କେନ୍ଦ୍ର କାର୍ମିକ ଓ ପ୍ରଶିକ୍ଷଣ ମନ୍ତ୍ରାଳୟ ପକ୍ଷରୁ ଓଡ଼ିଶା ସରକାରଙ୍କ ମୁଖ୍ୟ ଶାସନ ସଚିବଙ୍କୁ ଚିଠି ଲେଖାଯାଇଛି । ଯଦିଓ ବୈଷୟିକ ଭାବେ କାର୍ଯ୍ୟାନୁଷ୍ଠାନ ପାଇଁ ମୁଖ୍ୟମନ୍ତ୍ରୀଙ୍କ ଅନୁମୋଦନ ଆବଶ୍ୟକ । ଏହା ଜାଣିଥିବା ସାଂସଦ ଓ ରାଜ୍ୟ ସଭାପତି ଏହି ପ୍ରସଙ୍ଗକୁ ରାଜନୈତିକ ରଙ୍ଗ ଦେବା ପାଇଁ ଉଦ୍ୟମ ଜାରି ରଖିଛନ୍ତି ।