ଗୁରୁକେଳୁଚରଣ ମହାପାତ୍ର ଓଡ଼ିଶୀ ଗବେଷଣାକେନ୍ଦ୍ର, ଓଡିଶୀ ଆସର

ଭୁବନେଶ୍ୱର, ୨୪/୮: ଗୁରୁକେଳୁଚରଣ ମହାପାତ୍ର ଓଡ଼ିଶୀ ଗବେଷଣାକେନ୍ଦ୍ରରେ ପ୍ରତି ମାସ ଶେଷ ସପ୍ତାହରେ ଅନୁଷ୍ଠିତ ହେଉଥିବା ‘ଓଡ଼ିଶୀ ଆସର’ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏଥିରେ ଉଭୟ ଓଡ଼ିଶୀ ନୃତ୍ୟ ଓ ସଙ୍ଗୀତର କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଉକ୍ତ କାର୍ଯ୍ୟକ୍ରମରେ ଓଡ଼ିଶୀ ଗବେଷଣା କେନ୍ଦ୍ରରେ ଶିକ୍ଷାରତ ଛାତ୍ରଛାତ୍ରୀମାନେ ଅଂଶଗ୍ରହଣ କରିଥିଲେ।

କାର୍ଯ୍ୟକ୍ରମ ପ୍ରାରମ୍ଭରେ ଏକକ ସଂଗୀତ ‘ଆଜ ଏ କି ଗୁମାନରେ’, ପରିବେଷଣ କରିଥିଲେ ସୁନିତାରାଣୀ ବିଶ୍ୱାଳ । ପରେ ପରେ ନିଳୀମା ପ୍ରଧାନ ଏବଂ ସ୍ମୃତିରେଖା ପ୍ରତିହାରୀ- ‘କହିବୁ ଯାଇ ଶ୍ୟାମବନ୍ଧୁଙ୍କୁ ମନ ମଜାଇ’, ଅର୍ପିତା ସାହୁ ଏବଂ କବିତା ନାୟକ - ‘ଘେନାଇ ଆମ୍ଭେ ଯେତେ’ ଦ୍ୱେତ ଓଡ଼ିଶୀ ସଂଗୀତ ପରିବେଷଣ କରିଥିଲେ । ଆଦି ତାଳରେ ଏକକ ମର୍ଦ୍ଦଳ ବାଦନ କରିଥିଲେ ଜୟଗୁରୁ ପ୍ରଧାନ । ଏକକ ଓଡ଼ିଶୀ ନୃତ୍ୟ - ମଙ୍ଗଳା ଚରଣ ‘ପଦ ବନ୍ଦେ ଗଣନାଥ’ ଏବଂ ‘ମୋହନ ପଲ୍ଲବୀ’ ପରିବେଷଣ କରିଥିଲେ ଜ୍ୟୋତିରାଣୀ ନାୟକ । ଏଥିରେ କଣ୍ଠଦାନ କରିଥିଲେ ସୁନିତାରାଣୀ ବିଶ୍ୱାଳ।

ଉକ୍ତ ଆସରକୁ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ଯୁଗ୍ମ ନିର୍ଦ୍ଦେଶକ ତଥା ଓଡ଼ିଶୀ ଗବେଷଣା କେନ୍ଦ୍ରର ମୁଖ୍ୟ ନିର୍ବାହୀ ଶ୍ରୀଯୁକ୍ତ ସୁବୋଧ ଚନ୍ଦ୍ର ଆଚାର୍ଯ୍ୟଙ୍କ ଆବାହକତ୍ୱରେ ଏହାକୁ ପରିଚାଳନା କରିଥିଲେ ପ୍ରଶାସନିକ ଅଧିକାରିଣୀ ଅନୁଜା ତାରିଣୀ ମିଶ୍ର ।

ଏଠାରେ ସୂଚନାଯୋଗ୍ୟ ଯେ, ଆଜି ପୂର୍ବାହ୍ନରେ ଓଡ଼ିଶୀ ଗବେଷଣାକେନ୍ଦ୍ରର ପରାମର୍ଶଦାତା କମିଟି ବୈଠକ ନିର୍ଦ୍ଦେଶକ, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଶ୍ରୀ ଦିଲିପ ରାଉତରାଏଙ୍କ ଅଧ୍ୟକ୍ଷତାରେ ମୁଖ୍ୟ ନିର୍ବାହୀଙ୍କ କକ୍ଷରେ କମିଟିର ସଦସ୍ୟ / ସଦସ୍ୟାଙ୍କ ଗହଣରେ ହୋଇଥିଲା । ଓଡ଼ିଶୀ ଗବେଷଣା କେନ୍ଦ୍ରର ଉନ୍ନତିକଳ୍ପେ ବହୁବିଧ ଆକାଂକ୍ଷିତ କାର୍ଯ୍ୟକଳାପ ଗୁଡ଼ିକୁ ଅଗ୍ରସର କରିବା ଦିଗରେ ଉକ୍ତ ବୈଠକ ଅନୁଷ୍ଠିତ ହୋଇଥିଲା ଏବଂ ଏଥିରେ ଅନୁଷ୍ଠାନର ଉନ୍ନତିକଳ୍ପେ ଅନେକ ଗୁଡ଼ିକ ନୂତନ ପ୍ରସ୍ତାବ ବୈଠକରେ ଗୃହୀତ ହୋଇଥିଲା।