ରାଜ୍ୟସଭା ଉପାଧ୍ୟକ୍ଷ ପ୍ୟାନେଲରେ ଚାରି ମହିଳା ସାଂସଦ 

ରାଜ୍ୟସଭା ଉପାଧ୍ୟକ୍ଷ ପ୍ୟାନେଲରେ ଚାରି ମହିଳା ସାଂସଦ 
ରାଜ୍ୟସଭାର ଅଧ୍ୟକ୍ଷ ତଥା ଉପରାଷ୍ଟ୍ରପତି ଜଗଦୀପ ଧନଖଡ ଏକ ଐତିହାସିକ ପଦକ୍ଷେପ କ୍ରମେ ଚାରି ମହିଳା ସାଂସଦଙ୍କୁ ଉପାଧ୍ୟକ୍ଷ ପ୍ୟାନେଲକୁ ମନୋନୀତ କରିଛନ୍ତି । ପ୍ୟାନେଲକୁ ମନୋନୀତ ହୋଇଥିବା ସମସ୍ତ ମହିଳା ସାଂସଦ ପ୍ରଥମ ଥର ପାଇଁ ସଂସଦର ସଦସ୍ୟ ହୋଇଛନ୍ତି । ଏହି ଚାରି ମହିଳା ସଦସ୍ୟଙ୍କ ମଧ୍ୟରେ ଅଛନ୍ତି ମହିଳା ଭାବେ ନାଗାଲାଣ୍ଡରୁ ପ୍ରଥମ ଥର ପାଇଁ ନିର୍ବାଚିତ ରାଜ୍ୟସଭା ସାଂସଦ ଫାଙ୍ଗନୋନ୍ କୋନ୍ୟାକ (ବିଜେପି), ପିଟି ଉଷା (ମନୋନୀତ), ଫୌଜିଆ ଖାନ (ଆଇଏନସି) ଓ ସୁଲତା ଦେଓ (ବିଜେଡି) । ମୌସୁମୀ ଅଧିବେଶନ ପୂର୍ବରୁ ପୁନର୍ଗଠିତ ଉପାଧ୍ୟକ୍ଷ ପ୍ୟାନେଲରେ ମହିଳା ସଦସ୍ୟ ମାନଙ୍କୁ ସମାନ ପ୍ରତିନିଧିତ୍ୱ ଦିଆଯାଇଛି । ଏହି ପ୍ୟାନେଲକୁ ମନୋନୀତ ହୋଇଥିବା ଅନ୍ୟ ସଦସ୍ୟମାନେ ହେଲେ- ଭି ବିଜୟସାଇ ରେଡ୍ଡୀ, ଘନଶ୍ୟାମ ତିୱାରୀ, ଏଲ ହନୁମନ୍ତାୟା ଓ ସୁଖେନ୍ଦୁ ଶେଖର ରାୟ । ସେହିପରି ରାଜ୍ୟସଭା ଚେୟାର ସମ୍ପୂର୍ଣ୍ଣ ଡିଜିଟାଲ୍ ହୋଇ ପାରିଛି । ଗୃହରେ ପ୍ରାସଙ୍ଗିକ ଆଚରଣ, ଗୃହରେ ଉପସ୍ଥିତ ରହିବା, ସଭ୍ୟ ମାନଙ୍କର କଥାବାର୍ତ୍ତା ଏବଂ ଅନ୍ୟାନ୍ୟ ଆନୁଷଙ୍ଗିକ ସୂଚନା ପାଇଁ ରାଜ୍ୟସଭା ଚେୟାର ଇଲେକ୍ଟ୍ରୋନିକ୍ ଟାବ ବ୍ୟବହାର କରିବେ ।