ପତ୍ନୀ ହତ୍ୟା ମାମଲାରେ ପୂର୍ବତନ ବିଧାୟକ ଦୋଷୀ ସାବ୍ୟସ୍ତ

ପତ୍ନୀ ହତ୍ୟା ମାମଲାରେ ପୂର୍ବତନ ବିଧାୟକ ଦୋଷୀ ସାବ୍ୟସ୍ତ
ପତ୍ନୀ ହତ୍ୟା ମାମଲାରେ ପୂର୍ବତନ ଗୁଣୁପୁର ବିଧାୟକ ରାମମୂର୍ତ୍ତି ଗମାଙ୍ଗଙ୍କୁ ଶନିବାର ଭୁବନେଶ୍ୱର ସ୍ୱତନ୍ତ୍ର ଅଦାଲତ ଦୋଷୀ ସାବ୍ୟସ୍ତ କରିଛନ୍ତି । ଏହି ମାମଲାରେ ୧୧ ସାକ୍ଷୀଙ୍କ ବୟାନ ଓ ୧୫ ପ୍ରମାଣକୁ ଭିତ୍ତି କରି ଅଦାଲତ ପୂର୍ବତନ ବିଧାୟକଙ୍କୁ ଦୋଷୀ ସାବ୍ୟସ୍ତ କରିଛନ୍ତି । ତେବେ ଅଦାଲତ ମଙ୍ଗଳବାର ଏହି ମାମଲାର ଦଣ୍ଡ ଘୋଷଣା କରିବେ । ଅଗଷ୍ଟ ୨୯, ୧୯୯୫ରେ ରାମମୂର୍ତ୍ତିଙ୍କ ପତ୍ନୀ ଶଶିରେଖା ଗମାଙ୍ଗୋଙ୍କ ମୃତ ଦେହ ଖାରବେଳନଗର ସ୍ଥିତ ଏମ୍‌ଏଲଏ କଲୋନିରୁ ଉଦ୍ଧାର କରାଯାଇଥିଲା । ପତ୍ନୀ ଆତ୍ମହତ୍ୟା କରିଥିବା ନେଇ ନିଜେ ରାମମୂର୍ତ୍ତି ଥାନାରେ ଖବର ଦେଇଥିଲେ । ତେବେ ପୁଲିସ ତଦନ୍ତରୁ ଏହା ଆତ୍ମହତ୍ୟା ନୁହେଁ ହତ୍ୟା ବୋଲି ଜଣାପଡିଥିଲା । ଏହି ଘଟଣାରେ ପୁଲିସ ପ୍ରଥମେ ୟୁଡି ଓ ପରେ ହତ୍ୟା ମାମଲା ରୁଜୁ କରିଥିଲା । ସୂଚନାଯୋଗ୍ୟ, ୧୯୯୦ରେ ରାମମୂର୍ତ୍ତି ଗମାଙ୍ଗ ଜନତା ଦଳ ଟିକେଟରେ ବିଧାନସଭାକୁ ନିର୍ବାଚିତ ହୋଇଥିଲେ । ପରେ ସେ ଜନତା ଦଳ ଛାଡି ୨୦୦୦ରେ ବିଜେପି ଟିକେଟରେ ନିର୍ବାଚନ ଜିତି ଦ୍ୱିତୀୟ ଥର ବିଧାୟକ ହୋଇଥିଲେ ।