ଖୋର୍ଦ୍ଧାରେ ନୁଡଲ୍‌ସ ଓ ଚକୋଲେଟ୍ ଉତ୍ପାଦନ କରିବ ନେସ୍‌ଲେ 

୯୦୦ କୋଟି ଟଙ୍କା ବିନିଯୋଗରେ ଏଫ୍ଏମ୍‌ସିଜି କମ୍ପାନି ନେସ୍‌ଲେ ପକ୍ଷରୁ ଖୋର୍ଦ୍ଧାଠାରେ ହେବାକୁ ଥିବା ଉତ୍ପାଦନ ୟୁନିଟ୍ ରେ ଲୋକପ୍ରିୟ ମ୍ୟାଗି ନୁଡୁଲ୍ସ ଉତ୍ପାଦନ କରାଯିବା ସହ ପରବର୍ତ୍ତୀ ପର୍ଯ୍ୟାୟରେ ଚକୋଲେଟ୍ ଓ ମିଠା ସାମଗ୍ରୀ ଉପଲବ୍ଧ ହେବ ବୋଲି କମ୍ପାନିର ଅଧ୍ୟକ୍ଷ ତଥା ପରିଚାଳନା ନିର୍ଦେଶକ ସୁରେଶ ନାରାୟଣନ ସୂଚନା ଦେଇଛନ୍ତି। ଆଗାମୀ ବର୍ଷଗୁଡ଼ିକରେ  ଚାହିଦା ପୂରଣ କରିବା ପାଇଁ ଉତ୍ପାଦନ ବୃଦ୍ଧି, କ୍ଷମତା ବୃଦ୍ଧି ପାଇଁ ଓଡ଼ିଶା କାରଖାନା କଂପାନିର ରଣନୀତିର ଏକ ଅଂଶ ବୋଲି ସେ କହିଛନ୍ତି। "ଏହା ଏକ ବଡ଼ ପ୍ରକାରର ୟୁନିଟ୍ ଯାହାଆମେ ସେଠାରେ (ଓଡ଼ିଶା) ନିର୍ମାଣ କରିବୁ", ସେ କହିଲେ ଯେ କାରଖାନା ସ୍ଥାପନ ଏବଂ କାର୍ଯ୍ୟ ଆରମ୍ଭ କରିବାକୁ ପ୍ରାୟ ଦୁଇ ବର୍ଷ ସମୟ ଲାଗିବ। ଶ୍ରୀ ନାରାୟଣନ କହିଛନ୍ତି ଯେ ଏହି କାରଖାନା ପ୍ରଥମେ ନୁଡଲ୍ସ ଉତ୍ପାଦନ କରିବ ଏବଂ ପରେ ପରବର୍ତ୍ତୀ ପର୍ଯ୍ୟାୟରେ ଚକୋଲେଟ୍ ଏବଂ ମିଠା ସାମଗ୍ରୀ ଉତ୍ପାଦନ କରିବ। ନେସ୍‌ଲେ ଏହାର ଜଣାଶୁଣା ଉତ୍ପାଦ ମଧ୍ୟରେ କିଟ୍‌କାଟ୍‌ ଚକୋଲେଟ୍ ଏବଂ ନେସକାଫେ ଉତ୍ପାଦନ କରେ । କମ୍ପାନୀ ଏହାର ସମ୍ପ୍ରସାରଣ ଯୋଜନା ପାଇଁ ୨୦୨୩ରୁ ୨୦୨୫ ମଧ୍ୟରେ ୪୨୦୦ କୋଟି ଟଙ୍କା ଖର୍ଚ୍ଚ କରୁଥିବା ବେଳେ ସେଥିରୁ ଖୋର୍ଦ୍ଧାରେ ଏକ ନୂତନ କାରଖାନା ପାଇଁ ୯୦୦ କୋଟି ଟଙ୍କା ଖର୍ଚ୍ଚ କରାଯିବ। ଭୁବନେଶ୍ବର ଉପକଣ୍ଠରେ କାରଖାନା ସ୍ଥାପନ ପାଇଁ ନେସ୍ଲେର ପ୍ରସ୍ତାବକୁ ଚଳିତ ବର୍ଷ ଜୁନ୍ ମାସରେ ରାଜ୍ୟସ୍ତରୀୟ ସିଙ୍ଗଲ୍ ୱିଣ୍ଡୋ କ୍ଲିୟରାନ୍ସ ଅଥରିଟି (ଏସ୍ଏଲ୍ଏସ୍ଡବ୍ଲ୍ୟୁସିଏ) ଅନୁମୋଦନ କରିଥିଲା। ଏହି ୟୁନିଟ୍ ରେ ୮୨୭ ଜଣ ଙ୍କୁ ନିଯୁକ୍ତି ଦିଆଯିବ ବୋଲି ରାଜ୍ୟ ସରକାରଙ୍କ ପକ୍ଷରୁ କୁହାଯାଇଛି। ୫୦ ପ୍ରତିଶତରୁ ଅଧିକ ମହିଳା ଅପରେଟରଙ୍କ ସହ ଓଡ଼ିଶା କାରଖାନା ବିବିଧତାର ଏକ ଦୁର୍ଗ ହେବ ବୋଲି ଶ୍ରୀ ନାରାୟଣନ କହିଛନ୍ତି।