ପୂର୍ବତନ ବିଧାୟକଙ୍କ ସମେତ ୧୩ଜଣଙ୍କୁ ଆଜୀବନ କାରାଦଣ୍ଡ

ପୂର୍ବତନ ବିଧାୟକଙ୍କ ସମେତ ୧୩ଜଣଙ୍କୁ ଆଜୀବନ କାରାଦଣ୍ଡ
ଦୀର୍ଘ ୨୫ ବର୍ଷ ପୂର୍ବର ଏକ ହତ୍ୟା ମାମଲାରେ ଛତ୍ରପୁରର ପୂର୍ବତନ ବିଧାୟକ ତଥା ସିପିଆଇ ନେତା ନାରାୟଣ ରେଡ୍ଡୀଙ୍କ ସମେତ ୧୩ଜଣଙ୍କୁ ଏଡିଜେ-୩ କୋର୍ଟ ଆଜୀବନ ଜେଲ୍ ଦଣ୍ଡାଦେଶ ଶୁଣାଇଛନ୍ତି । ୧୯୯୮ ମସିହାରେ ଏକ ଜନଶୁଣାଣି ବେଳେ ତତ୍କାଳୀନ ପୁଲିସ ରିଜର୍ଭ ଇନସ୍ପେକ୍ଟର ବି.କେ. ମେହେରଙ୍କୁ ବୋମା ମାଡ କରି ହତ୍ୟା କରାଯାଇଥିଲା । ଉଲ୍ଲେଖଯୋଗ୍ୟ, ଟାଟା କମ୍ପାନୀର ଜମି ଅଧିଗ୍ରହଣ ବେଳେ ପୋଲିସ ଓ ଜନତା ମୁହାଁମୁହିଁ ହୋଇଥିଲେ । ଗଂଜାମ ଜିଲ୍ଲାର ସିନ୍ଧି ଗାଁରେ ଟାଟା ଜମି ଅଧିଗ୍ରହଣ ସମ୍ପର୍କରେ ସ୍ଥାନୀୟ ଲୋକଙ୍କ ସହ ପ୍ରଶାସନର ଏକ ବୈଠକ ହୋଇଥିଲା । ସଭା ଚାଲିଥିବା ବେଳେ ହଠାତ ଗଣ୍ଡଗୋଳ ହୋଇଥିଲା । ଏତିକିବେଳେ ବୋମା ମାଡରେ ପୁଲିସ୍‌ ଆର୍‌ଆଇ ବି.କେ ମେହେରଙ୍କ ମୃତ୍ୟୁ ହୋଇଥିଲା । ଏହି ଘଟଣାରେ ସିପିଆଇ ନେତା ନାରାୟଣ ରେଡ୍ଡୀଙ୍କ ସହ ୨୨ ଜଣଙ୍କ ନାଁରେ ମାମଲା ରୁଜୁ ହୋଇଥିଲା । ତେବେ ଦୀର୍ଘ ଦିନ ଧରି ମାମଲାଟି ବିଚାରାଧୀନ ଥିବାବେଳେ ଅଭିଯୁକ୍ତମାନଙ୍କ ମଧ୍ୟରୁ ୮ଜଣଙ୍କ ମୃତ୍ୟୁ ହୋଇସାରିଛି ।