ବିଦ୍ୟୁତ୍ ସଂସ୍କାର ପାଇଁ ଆର୍ଥିକ ପ୍ରୋତ୍ସାହନ ପ୍ରଦାନରେ ମଧ୍ୟ ଓଡିଶାକୁ ଅବହେଳା 

ବିଦ୍ୟୁତ୍ ସଂସ୍କାର ପାଇଁ ଆର୍ଥିକ ପ୍ରୋତ୍ସାହନ ପ୍ରଦାନରେ ମଧ୍ୟ ଓଡିଶାକୁ ଅବହେଳା 
ବିଦ୍ୟୁତ ମନ୍ତ୍ରଣାଳୟଙ୍କ ସୁପାରିସ ଅନୁଯାୟୀ ଅର୍ଥ ମନ୍ତ୍ରଣାଳୟ ୧୨ଟି ରାଜ୍ୟକୁ ୨୦୨୧-୨୨ ଏବଂ ୨୦୨୨-୨୩ରେ କାର୍ଯ୍ୟକାରୀ ହୋଇଥିବା ସଂସ୍କାର ପ୍ରକ୍ରିୟାକୁ ମଞ୍ଜୁରୀ ଦେଇଛି । ଗତ ଦୁଇଟି ଆର୍ଥିକ ବର୍ଷରେ ଏସବୁ ରାଜ୍ୟମାନଙ୍କୁ ଅତିରିକ୍ତ ଋଣ ଅନୁମତି ମାଧ୍ୟମରେ ୬୬ ହଜାର ୪୧୩ କୋଟି ଟଙ୍କାର ଆର୍ଥିକ ସମ୍ବଳ ସଂଗ୍ରହ କରିବା ଲାଗି ଅନୁମତି ଦିଆଯାଇଛି । ଏହି କ୍ରମରେ ଓଡ଼ିଶାକୁ ମାତ୍ର ୨ ହଜାର ୭୨୫ କୋଟି ଟଙ୍କାର ଆର୍ଥିକ ପ୍ରୋତ୍ସାହନ ରାଶି ମଞ୍ଜୁର କରାଯାଇଛି । ସଂସ୍କାର ପ୍ରକ୍ରିୟା ଆରମ୍ଭ କରିବା ପାଇଁ ପ୍ରୋତ୍ସାହନ ଆକାରରେ ୨୦୨୧-୨୨ ଏବଂ ୨୦୨୨-୨୩ ପାଇଁ ଅତିରିକ୍ତ ଋଣ ଅନୁମତିର ସଞ୍ଚୟୀ ରାଶି ବାବଦକୁ ଆନ୍ଧ୍ର ପ୍ରଦେଶକୁ ୯ ହଜାର ୫୭୪ କୋଟି, ଆସାମକୁ ୪ ହଜାର ୩୫୯ କୋଟି, ହିମାଚଳ ପ୍ରଦେଶକୁ ୨୫୧ କୋଟି, କେରଳକୁ ୮ ହଜାର ୩୨୩ କୋଟି, ମଣିପୁରକୁ ୧୮୦ କୋଟି, ମେଘାଳୟକୁ ୧୯୨ କୋଟି, ରାଜସ୍ଥାନକୁ ୧୧ ହଜାର ୩୦୮ କୋଟି, ସିକ୍କିମକୁ ୩୬୧ କୋଟି, ତାମିଲନାଡ଼ୁକୁ ୭ ହଜାର ୫୪ କୋଟି, ଉତ୍ତର ପ୍ରଦେଶକୁ ୬ ହଜାର ୮୨୩ କୋଟି ଏବଂ ପଶ୍ଚିମବଙ୍ଗକୁ ୧୫ ହଜାର ୨୬୩ କୋଟି ପ୍ରଦାନ କରାଯାଇଛି । ଏହି ପ୍ରକ୍ରିୟାରେ ରାଜ୍ୟଗୁଡିକ ୨୦୨୩-୨୪ ଆର୍ଥିକ ବର୍ଷରେ ବିଦ୍ୟୁତ କ୍ଷେତ୍ରରେ ସଂସ୍କାର ସହ ଜଡ଼ିତ ଅତିରିକ୍ତ ଋଣ ଉଠାଇବାର ସୁବିଧାର ଲାଭ ନେବା ଜାରି ରଖିପାରିବେ । ୨୦୨୩-୨୪ରେ ସଂସ୍କାର ପାଇଁ ରାଜ୍ୟମାନଙ୍କୁ ପ୍ରୋତ୍ସାହନ ରାଶି ବାବଦରେ ୧,୪୩,୩୩୨ କୋଟି ଟଙ୍କା ମିଳିବ । ୨୦୨୧-୨୨ ଏବଂ ୨୦୨୨-୨୩ରେ ସଂସ୍କାର ପ୍ରକ୍ରିୟାକୁ ପୂରଣରେ ଅସମର୍ଥ ରାଜ୍ୟମାନେ ଯଦି ଚଳିତ ଆର୍ଥିକ ବର୍ଷରେ ସଂସ୍କାରକୁ ଲାଗୁ କରିବାରେ ସକ୍ଷମ ହୁଅନ୍ତି ତା’ହେଲେ ସେମାନେ ୨୦୨୩-୨୪ ପାଇଁ ନିର୍ଦ୍ଧାରିତ ଅତିରିକ୍ତ ଋଣ ନେବାର ଲାଭ ମଧ୍ୟ ପାଇପାରିବେ ।