ଚେନ୍ନାଇସ୍ଥିତ ପ୍ରବାସୀ ଓଡିଆ ସଂଘ ସହ ଓଡିଶା ପରିବାର ନିର୍ଦ୍ଦେଶାଳୟର ବିଭିନ୍ନ ପ୍ରସଙ୍ଗରେ ଆଲୋଚନା

ଭୁବନେଶ୍ବର, ଜୁଲାଇ ୧୮:  ଚେନ୍ନାଇସ୍ଥିତ ମାଡ୍ରାସ ଓଡିଆ ସଂଘର କର୍ମକର୍ତ୍ତା ମାନଙ୍କ ସହ ଓଡିଶା ପରିବାର ନିର୍ଦ୍ଦେଶକ ଦିଲୀପ ରାଉତରାଏ ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରିଛନ୍ତି । ପ୍ରବାସୀ ଓଡିଆ ମାନଙ୍କ ସ୍ବାର୍ଥରେ ଗଠନ କରାଯାଇଥିବା ଓଡିଶା ପରିବାର ନିର୍ଦ୍ଦେଶାଳୟ ଭୂମିକା ଓ ଆଭିମୁଖ୍ୟ ସଂପର୍କରେ ସେଠାରେ ଥିବା ପ୍ରବାସୀ ମାନଙ୍କ ସହ ରାଉତରାଏ ଆଲୋଚନା କରିଛନ୍ତି । ରାଜ୍ୟ ସରକାରଙ୍କ ଏହି ପଦକ୍ଷେପକୁ ମାଡ୍ରାସ ଓଡିଆ ସଂଘର କର୍ମକର୍ତ୍ତା ମାନେ ଭୂୟସୀ ପ୍ରଶଂସା କରିଛନ୍ତି ।

ଏଥିସହ ଓଡିଆ ଭାଷା, ସାହିତ୍ୟ ଓ ସଂସ୍କତି ବିଭାଗ ମାନ୍ୟବର ମନ୍ତ୍ରୀ ଅଶ୍ବିନୀ କୁମାର ପାତ୍ର ଏବଂ ବିଭାଗୀୟ ନିର୍ଦ୍ଦେଶକ ଦିଲୀପ ରାଉତରାଏ ଚେନ୍ନାଇସ୍ଥିତ ଜଗନ୍ନାଥ ମନ୍ଦିର ଗସ୍ତକରି ଶ୍ରୀଜୀଉଙ୍କୁ ଦର୍ଶନ କରିଛନ୍ତି । ସେଠାରେ ଥିବା ପ୍ରବାସୀ ଓଡିଆ ମାନେ ନିଜସ୍ବ ଉଦ୍ୟମରେ ସେଠାରେ ଏକ ଭବ୍ୟ ମନ୍ଦିର ପ୍ରତିଷ୍ଠା କରିଛନ୍ତି ।  କଳା ଗ୍ରାନାଇଟ ପଥରରେ ନିର୍ମିତ ମନ୍ଦିର କାରୁକାର୍ଯ୍ୟ ଶ୍ରଦ୍ଧାଳୁ ମାନଙ୍କୁ ଆକର୍ଷିତ କରୁଛି । ଓଡିଶାର ପୂଜକ ମାନେ ସେଠାରେ ରହି ପାରମ୍ପରିକ ରୀତିନୀତି ଅନୁଯାୟୀ ଶ୍ରୀଜିଉ ମାନଙ୍କ ପୂଜାର୍ଚ୍ଚନା କରୁଛନ୍ତି ।

ଚୋଳାମଣ୍ତଳ ଶିଳ୍ପୀ ଗ୍ରାମ ଆର୍ଟ ଗ୍ୟାଲେରୀ ଠାରେ ଓଡିଶା ପ୍ରସିଦ୍ଧ ଆଦିବାସୀ ଚିତ୍ରକଳା ପ୍ରଦର୍ଶନୀ ଉଦଘାଟନ କରିବା  ଅବସରରେ ମାନ୍ୟବର ମନ୍ତ୍ରୀ, ବିଭାଗୀୟ ନିର୍ଦ୍ଦେଶକ ଓ ଅଧିକାରୀ ପ୍ରମୁଖ ଚେନ୍ନାଇ ଗସ୍ତ କରିଥିଲେ ।