ସୁପ୍ରିମକୋର୍ଟରେ ୱାକଫ ଆଇନ ଉପରେ ଶୁଣାଣି ଜାରି: କଣ ଯୁକ୍ତି ଦେଲେ କପିଲ ସିବଲ

ୱାକଫ ସଂଶୋଧନ ଆଇନ ୨୦୨୫ ଉପରେ ମଧ୍ୟବର୍ତ୍ତୀକାଳୀନ ସ୍ଥଗିତାଦେଶ ଦାବି ଉପରେ ମଙ୍ଗଳବାର ସୁପ୍ରିମକୋର୍ଟରେ ଶୁଣାଣି ଆରମ୍ଭ ହୋଇଛି। ଆଇନର ବୈଧତାକୁ ଚ୍ୟାଲେଞ୍ଜ କରି ମୁସଲିମ ପକ୍ଷ ପକ୍ଷରୁ ଉପସ୍ଥିତ ବରିଷ୍ଠ ଓକିଲ କପିଲ ସିବଲ ଆଇନର ବିରୋଧ କରି ଯୁକ୍ତିରେ ଦର୍ଶାଇଛନ୍ତି 'କୁହାଯାଉଛି ଯେ ଏହି ଆଇନ ୱାକଫ ସୁରକ୍ଷା ପାଇଁ କରାଯାଇଛି, ମାତ୍ର ପ୍ରକୃତରେ ଏହାର ଉଦ୍ଦେଶ୍ୟ ୱାକଫକୁ ଦଖଲ କରିବା।' ଆଇନକୁ ଏପରି ଭାବରେ ତିଆରି କରାଯାଇଛି ଯେ କୌଣସି ପ୍ରକ୍ରିୟା ଅନୁସରଣ ନକରି ୱାକଫ ସମ୍ପତ୍ତିକୁ ଛଡ଼ାଇ ନିଆଯାଇପାରିବ ବୋଲି ସିବଲ ଯୁକ୍ତି ଦର୍ଶାଇଛନ୍ତି। 

ସିବଲ ଆଇନର ବିଭିନ୍ନ ଧାରା ଉଦ୍ଧୃତ କରି ଏହାର ବୈଧତା ଉପରେ ପ୍ରଶ୍ନ ଉଠାଇ କହିଛନ୍ତି ଯେ ୱାକଫ (ସଂଶୋଧନ) ଆଇନ, ୨୦୨୫ ଧାରା ୨୫ ଓ ୨୬ ଅନୁଯାୟୀ ଧାର୍ମିକ ସ୍ୱାଧୀନତାର ମୌଳିକ ଅଧିକାର ଏବଂ ଧାର୍ମିକ ସମ୍ପତ୍ତି ପରିଚାଳନାର ଅଧିକାରର ଉଲ୍ଲଂଘନ କଥା କୁହାଯାଇଛି। ସୂଚନାଯୋଗ୍ୟ, ୱାକଫ ସଂଶୋଧନ ଆଇନ ୨୦୨୫ର ବୈଧତାକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଅନେକ ଆବେଦନ ବିଚାରାଧୀନ ଅଛି। ମୁଖ୍ୟ ବିଚାରପତି ବି.ଆର. ଗଭାଇ ଏବଂ ବିଚାରପତି ଏଜି ମାସିହଙ୍କ ଖଣ୍ଡପୀଠ ଏହି ମାମଲାର ଶୁଣାଣି କରୁଛନ୍ତି।

ୱାକଫ ସଂଶୋଧନ ଆଇନ ୨୦୨୫କୁ ଚ୍ୟାଲେଞ୍ଜ କରୁଥିବା ଆବେଦନଗୁଡ଼ିକରେ, ଆଇନ ଉପରେ ଏକ ଅନ୍ତରୀଣ ସ୍ଥଗିତାଦେଶ ମଧ୍ୟ ଦାବି କରାଯାଇଛି, ଅନ୍ୟପକ୍ଷରେ, କେନ୍ଦ୍ର ସରକାର କୋର୍ଟରେ ଦାଖଲ କରିଥିବା ତାଙ୍କ ଉତ୍ତରରେ, ଆଇନକୁ ଯଥାର୍ଥ ଦର୍ଶାଇ ଅନ୍ତରୀଣ ସ୍ଥଗିତାଦେଶକୁ ବିରୋଧ କରିଛନ୍ତି।